ILOILO CITY – Nagalain ang buot sang punong barangay sang Brgy. Lapuz Norte, Iloilo matapos ginbuyayaw sang isa ka pumuluyo sa ila barangay bangud iya ini ginsaway sa sala nga pag-parking sang salakyan.
Sa interview san Bombo Radyo kay Punong Barangay Ricardo Flores, iya ginpahayag nga ang salakyan sang isa ka residente nga si Mary Ann ang ginareklamo bangud nagatublag ini sa alagyan malapit sa isa ka pribado nga bodega nga nahamtang sa barangay road.
Suno kay Flores, ginbutangan niya sang tarpaulin nga naka-indikar sang ‘NO PARKING’ sa lugar apang hungod ini nga ginkakas.
Bangud sini, masunod nga ginpapintahan niya sang amo gihapon nga paandam ang amo nga lugar apang santu sa report sang isa ka brgy tanod, ini ang ginpanas man.
Ginpadulungan ni Flores si Mary Ann agud personal ini nga sawayon apang nadismaya siya nga ginbuyayaw pa sya sini kag ginhambalan nga indi makahibalo magbasa.
Gin-athag naman ni Flores nga santu sa ordinansa sang ila barangay, ginadumilian ang pagparking sa mga barangay road, ilabi na kon makaperwsiyo sa naga-agi nga iban nga salakyan.
