ILOILO CITY – Ginpanginwala sang punong barangay sang Railway, La Paz, Iloilo City ang mga report nga may ginasukot pa nga P150 sa mga tawo nga magagawad sang barangay clearance agud makakuha sang quarantine pass.
Ang poster nga ‘NO BARANGAY CLEARANCE, NO QUARANTINE PASS’ ang nakatapik mismo sa gwa sang barangay hall sa amo nga lugar.
Sa interview sang Bombo Radyo kay Punong Barangay Reynaldo Guillergan, iya ginpahayag nga ang barangay clearance nga ila buot-silingon sa amo nga poster ang eksklusibo lang para sa mga vendors sa La Paz market nga magagawad sang lisensya apang wala nakabayad sang tax sa sulod na sang duha ka tuig.
Paathag ni Guillergan, wala na sang requirements para sa quarantine kag ihatag nila ini nga wala sang sukot bangud ila ini obligasyon.
Suno pa sa natungdan, 50% na subong sa mga households sa ila barangay ang nakakuha sang quarantine pass. Bwas na, Hunyo 4, ini iga-require sa Iloilo City.
