ILOILO – Nagpalab-ot sang pagpasalamat ang bug-os nga pwersa sang kapulisan sa tanan nga pumuluyo bangud nangin matawhay ang pagsaulog sang holiday season.
Sa interview sang Bombo Radyo kay Pol Col Martin Defensor Jr., director sang Iloilo City Police Office iya ginpahayag nga mabaskog ang ila paglaom kag pagpati nga mangin matawhay ang pagsulaog sang bag o nga tuig kaangay man sang nangin pagsaulog sang paskwa sa syudad sang Iloilo.
Sa pihak sini, suno kay Defensor nakahanda ang hanay sang kapulisan nga magresponde sa anuman nga sahi sang krimen nga posible magluntad.
Dugang sang natungdan, may yara na sang 470 ka mga kapulisan ang naka deploy sa ila tagsa ka mga lugar
Santo sa pahayag ni Defensor, wala nila ginadumili ang pag inom sang makahululubog nga ilimnon apang kun mahimo indi lang magpasobra bangud ini ang gina tudlo nila nga isa ka rason sang ginamo apang kun posible, likawan nalang ini.
Ginpanugyanan man sang natungdan ang mga pumuluyo nga kun mahimo magsunod sa mga ginhatag nga pagsulundan agud mangin matawhay pagsulod sang bag o nga tuig.
Samtang, nagpanugyan man ang Iloilo Police Provincial Office nga likawan nga mag ubra sang mga gindumilian kaangay sang pagpalupok sa indi designated area kag iban pa.
Sa interview sang Bombo Radyo kay Police Col. Roland Vilela, director sang Iloilo Police Provincial Office iya ginpahayag nga kun mahimo indi nalang mag inom sang makahululubog nga ilimnon agud ma likawan ang disgrasya.
Suno kay Vilela, naka red alert status na ang bug os nga pwersa sang kapulisan sa probinsya sang Iloilo humalin pa sang Disyembre 15.
Dugang sang natungdan, apisar nga ginsuspende na nila ang operasyon sang kapulisan nagakadapat man sa gihapon nga mag report sila sa pinakamalapit nga estasyon.
