Ginbaton ni Ramil Madriaga ang hangkat ni Davao City Mayor Sebastian “Baste” Duterte nga matapungulay sila nga duha.
Si Madriaga amo ang self-confessed bagman ni Vice Presidente Sara Duterte nga nagtestigo batok sa bise president sa impeachment hearing sang Kamara sang Martes.
Sa isa ka sulat ni Madriaga nga ginpagwa sang iya abogado, ginsiling sini nga isa ka pribelihiyo ang hangkat sang bata sang anay Presidente kag handa ini nga mag-atubangay sila sa pisikal nga inaway.
Apang, ginpunto man sini nga sa subong napreso ini kag naga-edad na sang 58 anyos kag limitado na iya sitwasyon.
Gani, ginpangabay sini nga ang ila away pagahiwaton sa iya detention facility sa Camp Bagong Diwa sa Taguig City.
Dugang pa sini nga handa man ini nga magbato basta masolbar anay ang mga kaso nga ginapangatubang sini.
Nahibaluan nga ini nga paghangkat nag-ugat matapos nga gin-mensyonar si Baste Duterte sa supplemental affidavit ni Madriaga sa sa hearing sang House Justice Committee kaangot sa impeachment complaints batok kay Vice President Sara Duterte.
Naghangkat man si Baste nga bisan dal-on pa ni Madriaga si former PNP Chief Gen. Nicolas Torre III.
Matandaan nga sang 2025, sang PNP pa si Torre, ginhangkat man ini anay ni Baste sa tapungulay.
Ginbaton ini ni Torre kag nag-set up pa sang ring para sa 12 ka round nga sambuwa sa Rizal Memorial Coliseum sa Manila.
Gindeklarar si Torre nga winner by default matapos naglupad si Baste pa-Singapore antes ang away kag wala nag-atubang kay Torre.
Masobra na sa 6,700 ka mga overseas Filipino workers ang na-repatriate halin sa Middle East halin sang nagsugod ang gyera.
Sandig ini sa gin-report sang Department of Migrant Workers.
Suno kay DMW Undersecretary Jainal Rasul Jr., pila ka mga OFW ang permanente nga nadulaan sang trabaho samtang may iban naman nga temporaryo nga nag-untat anay sa pag-obra.
Naghatag naman ang ahensya sang bulig sa mga apektado nga mga overseas workers kag ginhimo nga simple ang proseso sang aplikasyon agud makauha sang bulig pinansyal nga nagalab-ot sang 200 dollars ukon P12, 100 nga halin sa pondo sang ahensya.
Samtang, gin-report naman ni DMW Secretary Hans Leo Cacdac nga sa 6, 706 ang na-repatriate, masobra 5,000 sa mga ini ang mga OFW samtang masobra 1,300 sa ila ang dependents kag may ara man sang turista kag iban nga overseas Filipinos.
Pinakadako nga numero sang mga na-repatrite ang nagikan sa Dubai, ginsundan ini sang Kuwait, Abu Dhabi, Qatar, Bahrain, Riyadh, Al Khobar, Israel, Jeddah kag Oman.
Magluwas diri, may ara naman nga mga OFW halin sa Middle East ang ginaluman nga maga-abot sa pungsod subong nga adlaw kag masunod nga semana.
