Imbitaron sa hearing sang Committee on Agriculture kag Committee on Economic Affairs and Investment sa Sangguniang Panlalawigan sang Iloilo ang mga tiglawas halin sa Iloilo City kag kaiping nga mga probinsya sa Western Visayas.
Ini agud nga ma-istoryahan ang mga rason sa likod sang pagbalang-balang sang hog industry sa probinsya nga ginaangot sa ginapahayag nga diktahanay sang presyo sa merkado kag importasyon.
Ini nga imbestigasyon ang kasunod sang nangin privilege speech ni Board Member Rolito Cajilig, chairperson sang Agriculture committee, nga nagakwestyon sang daku nga antad sang presyuhanay sang baboy nga halin sa mangunguma ipaanggid sa nagapanglakaak nga presyo sa mga merkado.
Suno kay Cajilig, base sa ila nga mga konsultasyon, nakit-an nga madamo nga manugsagod sang baboy sa probinsya ang nagapanirado na lang bangud sa mahal nga production cost kaangay sang mga balaklon nga feeds, apang tuman naman ka barato ang bakal sang ila ginsagod nga mga baboy.
Ginpahayag ni Cajilig nga bisan P300 tubtub P360 ang presyo sang kada kilo sang baboy sa merkado, ang aktwal nga ginabaton sang mga local hog raisers ang nagatupa lamang sa P160 tubtub sa P170 kada kilo.
Magluwas diri, isa pa sa mga rason sang pagbakho sang local hog raisers suno kay Cajilig amo ang importasyon.
Ginaduso sini nga paagi sa inquiry, masolbar ang isyu sang imported pork nga ginapahayag nagaagi backdoor bangud sang hugot nga restrictions sa probinsya sang Iloilo sang tion nga may African Swine Fever (ASF).
Bangud mataas ang pagpangudal sang Iloilo suno kay Cajilig, ginapaagi ang imports sa mga lugar nga indi masakop sang ordinansa sang Iloilo Province kaangay sang Capiz, Antique, kag Iloilo City.
Sa una nga quarter sang 2026, naglab-ot sa 1.2 million kilograms sang imported kag shipped-in pork ang nagsulod sa Iloilo.
Paagi sa hearing suno kay Cajiilig, mausisa ang market sang importasyon bangud sa ila inisyal nga impormasyon, ang naga-cater sang imported pork kag processed food amo ang dalagku nga mga mall, restaurants, kag hotels, samtang nagamantiner naman ang local hog raisers sa mga middle men nga kontrolado man ang presyo.
Kun mahimo pa lang suno sa opisyal, imbitaron man nila ang middlemen sa ila nga mangin hearing agud nga mapalab-ot man ang ila nga nga sentimyento.
Sa subong suno kay Cajilig, ginatipon pa ang kumpleto nga data halin sa Provincial Agriculture Office agud nga ma-isa-isa man nila ang ila nga mga ipamangkot sa imbitaron nga mga resource person.
Nahibaluan nga base sa data nga ginpresentar sa sesyon sang Iloilo Provincial Board, ang backyard kag small-scale raisers ang naga-account sang 91.77 percent sang swine inventory sang Iloilo gani nga maathag nga vulnerable sila sa market fluctuations kag pricing pressures.#
