ILOILO CITY – Ginpagwa na ni Iloilo City Mayor Jerry Tre?as ang bag-o nga executive order kun sa diin nakasaad ang mga pagsulundan samtang naka-Enhanced Community Quarantine (ECQ) ang syudad sang Iloilo tubtub sa Hulyo 31.
Effective immediately ang implementasyon sang Executive Order No. 60.
Yari ang pila ka mga punto nga dapat mo tandaan.
Magaumpisa ang curfew 9:00 sa gab-i kag magalawig tubtob 4:00 sa kaagahon.
Exempted sa curfew ang nagatrabaho sa warehouses, media, food manufacturing, kag iban pa nga kaangay nga negosyo kag trabaho nga naga-require sa mga tawo nga magpauli nga lapaw sa curfew hours.
Ginadumilian nga makahalin sa balay ang katapo sang vulnerable sector.
Ini ang ginalakipan sang mga tawo nga nagaedad sa masobra 65 anyos, mga indibidwal nga nagaedad sang mas manubo sa 18 anyos, mga nagabusong, mga indibidwal nga may comorbidities kag immune-deficiences, kag mga Persons With Disabilities (PWDs).
Wala sang required nga quarantine pass samtang ginapatuman ang ECQ.
Sa bahin sang management sang mga close-contact individuals:
Tanan nga indibidwal nga ginakabig close contact sang COVID-19 positive person ang dapat nga i-subject sa istrikto nga 14 ka adlaw nga quarantine.
- Kun negatibo ang resulta sang test, kumpletuhon gihapon ang 14 ka adlaw nga quarantine.
- Kun positibo ang resulta, kumpletuhon ang 14 ka adlaw nga quarantine kag kinahanglan nga i-reswab sa ika-14 nga adlaw sang quarantine.
Sa bahin naman sang alcoholic drinks:
Ginadumilian ang pag-inom sang makahulubog nga ilimnon sa pampubliko nga lugar; apang, ginapahanugutan ang pagbaligya sini nga ilimnon umpisa 8:00 sa aga tubtub 6:00 sa gab-i.
Yari ang mga ginadumilian nga mga establisyemento kag mga aktibidad:
- Entertainment venues nga may live performers
- Recreational venues
- Outdoor sports courts ukon venues para sa scrimmages, games, kag activities
- Indoor sports courts kag venues, fitness studios, gyms, spa, kag leisure centers
- Casino, bulangan kag operasyon sini pati na ang e-sabong ukon online bulang
- Indoor visitor ukon tourist attractions, libraries, archives, museums, galleries, kag cultural shows kag exhibits
- Outdoor tourist attractions
- Venues sa Face-to-Face nga mga meeting
- Personal Care Services nga nagalakip sang mga beauty salon, barbershop, nail spa, kag iban pa nga establisyemento nga may kaangay nga serbisyo
- Dine-In services sang food preparation establishments
Sa transportasyon: Mahimo nga maka-operate ang mga public utility jeepneys kag iban nga motor vehicles nga nagabyahe sa sulod sang Iloilo City apang limitado lamang sa 50 percent ang seating capacity.
Unhampered naman ang hulag sang cargo ukon delivery vehicles.
Ginadumilian ang mass gatherings ukon pagtinipun-tipon sa bilog nga syudad, pati na ang gatherings sa mga balay nga may mga magatambong nga tawo ukon bisita nga nagaistar sa separado nga puluy-an.
Ginapahanugutan ang religious denominations apang tubtob lamang sa 10 percent nga venue capacity.
Pwede ang kasal kag bunyag apang limitado lamang sa immediate members sang pamilya kag indi dapat magsobra sa 20 ang makatambong.
Tubtob sa tatlo ka adlaw lamang ang ginapahanugutan nga haya sa patay kag dapat nga istrikto nga ginapatuman ang minimum public health standards.
Sa lubong, immediate members of the family lamang ang pwede nga makakadto kag indi dapat magsobra sa 40 ka tawo.
Ang mga hotel kag accommodation establishments ang pwede nga makaoperate apang tubtob lamang sa 50 percent nga operational capacity.
Sirado ang mga swimming pools sa sini nga mga establisyemento.
Sirado man ang Iloilo esplanades, playgrounds, kag plazas.
Magapadayon ang vaccine rollout sa identified nga vaccination sites.
Ginkumpirma man ni Mayor Tre?as nga indi pag-untaton ang commercial flights bangud sang magapauli ukon magaabot nga APOR, returning residents, kag mga OFWs.
