Wala napunggan nga mamulugot ang pila ka residente sang Barangay Tanza Esperenza, Iloilo City Proper bangud sa wala matapos kag masapakan ang ila multipurpose gym.
Sa interview sang Bombo Radyo kay Punong Barangay Welbor Orada sang Tanza Esperenza, iya ginpahayag nga lima na ka tuig sang ginsugoran patukod ang multipurpose building kon sa diin, nagsugoran sang Enero 2020.
Suno kay Welbor, bangud sa delay kag wala natapos-tapos nga proyekto, sila ang ginabasol sang mga pumuluyo.
Nagalaum man ini nga masapakan sang Iloilo City District Engineering Office agud mapadayon ang paghuman sang multipurpose gym kag ila na nga magamit.
Ginlaragway man sini ang proyekto nga ‘long overdue’ na bangud sa kadugayon sini nga wala matandog.
Ginkadismaya man sang natungdan ang indi pagkoordinar sa ila sang kontraktor sang proyekto.
Nahibaluan nga ginalakipan sang evacuation center, mini market, covered gym, kag barangay hall ang na-delay nga multipurpose gym.
