ILOILO CITY- Napasakaan na sang kaso sang Bingawan Municipal Police Station ang retired army nga nagapanag-iya sang indi lisensyado nga mga armas nga narekober sang otoridad.
Sa interview sang Bombo Radyo kay Pol. Lt. Ryan Christ Inot, hepe sang Bingawan Municipal Police Station, iya ginpahayag nga kaso nga paglapas sa Republic Act 10591 ukon Comprehensive Firearms and Ammunition Regulation Act ang ginpasaka batok kay Regino Ligaray, residente sang Sitio Dalusan, Brgy. Quinar-upan, Bingawan, Iloilo.
Suno kay Inot, nagapabilin naman nga at-large ang amo nga retired army.
Matandaan nga ginserbehan sang search warrant si Ligaray kun sa diin narekober ang isa ka 12-gauge shotgun, isa ka caliber .38 revolver nga may duha ka ammunition, isa ka caliber .45 pistol, isa ka 12-gauge homemade shotgun, kag madamo nga mga ammunitions.
Ginpahayag nga nagapangtaya-taya man ini sang armas sa tion nga mahubog.
