Ipatuman umpisa 7:00 subong nga aga, Septyembre 24, ang road closure sa portion sang Iloilo Circumferential Road 1 sa Barangay Buhang, Jaro, Iloilo City.
Magalawig ang road closure tubtob sa Domingo, Septyembre 26.
Ini ang may kaangtanan sa pag-install sang Department of Public Works and Highways (DPWH) sang walo ka girders para sa nagapadayon nga construction sang Buhang Flyover.
Sa interview sang Bombo Radyo kay Mr. Jeck Conlu, head sang Public Safety and Transportation Management Office (PSTMO), iya ginpahayag nga dapat mag-agi ang mga trucks sa area sang Leganes.
Ang private vehicles naman ang mahimo nga makaagi sa Alta Tierra Road pakadto sa Tacas, Jaro Road ukon pwede man sa Hechanova Road lapos sa Circumferential Road.
Adlaw lang ang closure (7:00 am – 5:00 pm) kag pwede nga maka-resume ang mga nagalabay kun gab-i.
