RSTU 6, ginapasiguro nga wala sang maltreatment nga ginahimo sa mga police trainee

Ginpasiguro sang Regional Special Training Unit 6 (RSTU 6)nga wala sang hazing ukon ano man nga klase sang maltreatment nga ginahimo sa mga police trainee sa Western Visayas.

Ini kasunod sang natabo sa Police Regional Office–Bangsamoro Autonomous Region (PRO-BAR), kun sa diin gin-relieve ang 70 ka mga pulis matapos nga ginapangkastigo sang mga ini ang mga police trainee sa ila reception rites.

Sa interview sang Bombo Radyo kay Police Lieutenant Colonel Darwin Valderas, officer in charge sang RSTU 6, iya ginpahayag nga samtang siya nagadumala sang unit, iya gid pagasiguradohon nga wala sang maltreatment ukon hazing nga matabo sa ila mga trainee.

Suno kay PLtCol. Valderas, isa ini ka criminal act kag sinang-una pa nga pamaagi nga indi na dapat pag-ubrahon subong nga panahon.

Pahayag pa niya, may yara na sang anti-hazing law kun sa diin dapat mangin propesyonal na ang pagdumala sang mga training sa subong nga tion.

Nagapati man ini nga ang ano man nga sahi sang pagpang-abuso ang indi epektibo nga pamaagi agud magdisiplina sang mga trainee.

Ginpahayag pa niya nga may yara sang close supervision sa mga training sang kapulisan kag ginapaidalom man sa briefing ang mga Instructors kag Assistant Instructors (AI) antes mag-umpisa ang training.

Gina-engganyo man niya ang mga police trainee nga gilayon mag-report kun maka-eksperyensya sang pagpangmaltrato, bangud sigurohon nila nga manabat ang ang sin-o man nga maghimo sini.

Sang nagligad nga tuig, may ara sang ginpasakaan sang kaso nahanungod sa pagpang-abuso sa mga trainee sang Philippine National Police (PNP) Special Weapons and Tactics (SWAT) training, kun sa diin nagapakita ini nga seryoso ang ila opisina sa pagpatuman sang disiplina sang mga naga-abusar.

Nahibaluan man nga natalana nga magapaidalom subong nga bulan sa Basic Internal Security Operations Course (BISOC) training ang 281 ka mga pulis sa Western Visayas sa Camp Jalandoni, Brgy. Zerrudo, Sara, Iloilo.