Ginhangkat sang spokesperson sang Regional Task Force to End Local Communist Armed Conflict (RTF-ELCAC) si Gabriela Women’s Partylist Representative Arlene Brosas nga mag-resign sa pwesto.
Ini may kaangtanan sa pahayag ni Brosas nga mas maayo nga i-abolish na lang ang amo nga task force bangud ginagamit lamang ini sa pag-red-tag, pagpang-harass, kag pagpang-intimidate sa mga lehitimo nga organisasyon sang mga tawo, mga aktibista, kag mga human rights defenders.
Suno kay Prosecutor Flosemer Chris Gonzales, spokesperson sang task force sa Region 6, unethical para sa isa ka government official kag makabig nga pagtraidor sa konstitusyon ang pahayag ni Brosas.
Ginpahayag ni Gonzales nga wala ini nanamian sa ginaduso ni Brosas gani mas mayo nga maghipos na lang ang mamalidha.
Nanindugan man ang spokesperson nga madamo sang nabuligan ang amo nga programa kag napa-surrender nga mga New People’s Army (NPA).
Dugang niya, ginakabig man ini nga “whole-of-nation approach ” sa pagsolbar sang mga isyu nga nagapalig-on sang insurhensya paagi sa pagpasanyog sang kalinong, pag-uswag, kag maayong panggobyerno sa mga lugar nga apektado sang mga kinagamo.
