ILOILO – Pormal na nga ginpaiway ang pagpatigayon sang RUN for Jesus 2020 sa Pebrero 27 sa La Paz Plaza Football Field bangud sa padayon nga pagpamahog sang COVID-19.
Ini ang nadesisyunan sang Iloilo City Government kag Iloilo Provincial Government nga ginpangunahan ni Iloilo City Mayor Jerry Treñas kag Iloilo Governor Arthur Defensor Arthur Defensor Jr. paagi sa ginpatigayon nga Inter-agency meeting may kaangtanan sa COVID-19.
Sa interview sang Bombo Radyo kay Lucy Sinay, Public Information Officer sang Iloilo City Government iya ginpahayag nga pila ka rason ang ginkosidera sang Local Government kag kag iban pa nga mga ahensya sa pagkansela sang nasambit nga event.
Suno kay Sinay, una na diri ang status sang COVID-19 sa Daegu, City sa South Korea sa diin nahamtang ang simbahan nga apektado sang nasambit nga virus kag didto man magahalin ang 35 ka mga Event Coordinators.
Dugang sang natungdan, magabalay sang Executive Order ang Iloilo City Government kag Iloilo Provincial Government may kaangtanan sa suspension ukon kanselasyon sang tanan nga public gathering humalin sa bulan sang Pebrero tubtob Marso kag ini ang gilayon nga igahanda sang City Legal Office, City Mayor’s Office kag City Health Office.
Santo sa pahayag ni Sinay, ginpanugyanan man ang apat ka mga South Koreans nga yara sa listahan nga ginauyatan ni Iloilo City Mayor Jerry Treñas nga magpabilin sa ila mga hotels kag ginpanugyanan man sila nga boluntaryo nga magpaidalom sa quarantine samtang ginpanugyanan man ang isa sa ila nga magpaidalom sa Person’s under monitoring protocol.
Magluwas sa apat ka mga South Koreans nga yari na sa syudad sang Iloilo, ginamonitor man ang 16 ka mga Korean nga Pastor nga nagikan sa Daegu, City nga nagdirect flight sa Kalibo padulong sa syudad sang Iloilo.
Ginpahayag ni Sinay nga pagapanugyanan ang 16 ka mga Pastor nga boluntaryo nga magpaidalom sa quarantine.
Alertuhon man ang Brgy. Bolilao, Mandurriao Iloilo City bangud may yara sang Korean School malapit sa ila barangay.
