ILOILO CITY – Magadihon sang bag-o nga mga guidelines ang Iloilo Schools Sports Council (ISSC) agud mapauswag pa ang dalagan sang mga sports events sa masunod nga pagpatigayon sang Integrated Meet.
Sa interview sang Bombo Radyo kay Nick Valenzuela, Schools Division of Iloilo sports officer, iya ginpahayag nga ginaplano nila nga mag-formulate sang panibag-o nga mga basehan magluwas pa sa mga pagsulundan nga yara na sa kada sport discipline.
Ini ang kasunod sang mga ‘confusion‘ nga nagluntad kag pag-ginamo nga natabo sa nagligad nga mga sports competition lakip na ang away sang 1st kag 4th Congressional District Sports Association (CDSAs) sa baseball-elementary subong nga adlaw, Disyembre 11.
Kabahin man sang mga nakita nga problema suno kay Valenzuela amo ang mga spectators kag mga nagalantaw nga indi na makontrol sa tion nga nagasabad sila sa hampang.
Nadala sa obligasyon sang coach kag sang technical officials ang crowd control kag pagpahanumdom sang ‘sportsmanship’ sa kompetisyon.
Apang aminado si Valenzuela nga indi mahapos ang paglikop sang amo nga obligasyon ilabi na kon agresibo ang mga nagalantaw.
Kaangot sini, ginpahayag sang natungdan nga isulod nila sa igadihon nga guidelines ang posible nga sanction para sa mga masabad nga tumalan-aw.
Suno kay Valenzuela, sa subong, ang ila ginabasehan amo ang memorandum nagikan sa central office.
