Natukiban sang Jaro Police Station nga sa gwa sang Medicus Diagnostic Center sa Lapaz nakuha sang mga basurero ang masobra 100 ka SARS-COV-2 Rapid Antigen Test Kits nga sang ulihi ginhal-id lang sa kilid sang dalan sa Barangay San Vicente, Jaro, Iloilo City.
Sa interview sang Bombo Radyo kay Police Captain Eduardo Siacon, hepe sang estasyon, iya ginpahayag nga may nabilin pa nga used test kits sa gwa sang amo nga diagnostic center.
Na-trace ini sang mga pulis paagi sa pagtumod sa identity sang mga basurero nga amo ang nakit-an sa Closed Circuit Television Camera (CCTV) footages sang nagligad nga Hulyo 7, ‘las 6:30 sang gab-i.
Suno sa hepe, nakit-an ang pedicab sang mga basurero sa plaza sa Mandurriao. Ang mga basurero amo sanday Alias Arnel kag Russel.
Santo sa panaysayon sang duha, ginkuha nila ang used test kits sa pagdumdom nga pwede mabaligya apang bangud indi man mabaton sa kiluhan, ginhal-id lang sa kilid sang dalan. Indi magpasaka sang kaso ang pulis sa duha bangud ginapahayag nga kulang ang mga ini sa husto nga ihibalo.
Nagpakig-angot naman ang Jaro Police Station sa Lapaz Police Station kag sa COVID-19 team sang Iloilo City Government angot sa mangin salabton sang amo nga diagnostic center.
Una na nga ginpaathag ni Dr. Stephanie Abello, chief pathologist sang Western Visayas Medical Center (WVMC) Sub-National Laboratory, nga ‘potentially infectious’ ini nga test kits bangud nagaunod ini sang discharges sang tawo.
Nagakadapat nga may yara sang trained personnel kag maid-id nga proseso sa pag-disinfect kag pag-dispose sang sini nga infectious waste.
Bukas ang Bombo Radyo sa pagpaathag sang Medicus Diagnostic Center.
