Mangin maathag nga akto sang giyera kun kuhaon sang China ang BRP Sierra Madre sa Ayungin Shoal sa West Philippine Sea.
Ginpahayag ini ni Defense Secretary Gilberto Teodoro Jr. kag ginsiling nga nagalaum siya nga magbulig ang United States sa Pilipinas batok sa harassment sang China bangud nga may mga tawo sa amo nga warship.
Suno kay Teodoro, ini isa ka outpost sang Philippine sovereignty gani indi lamang ini natuhoy sa amo nga daan nga barko kundi sa teritoryo sang Pilipinas.
Nahibaluan nga ang BRP Sierra Madre ang yara na sa Ayungin Shoal humalin sang 1999 kag simbolo ini sang soberanya sang pungsod.
Una na ginpahayag ni Philippine Navy spokesperson for the West Philippine Sea Commodore Roy Trinidad nga may kinamatarung ang Pilipinas nga ipabilin ang BRP Sierra Madre sa Ayungin Shoal sa pihak sang demand sang China nga kuhaon ini.
Nagpabutyag man ang China sang kabalaka sa Mid-Range Capability Missile System nga batunon sang Pilipinas halin sa US.
Apang suno kay Teodoro, wala sang labot diri ang China kag para ini sa depensa sang Pilipinas.
Wala man niya ginkumpirma ukon ginpanginwala nga may plano ang Pilipinas nga mag-acquire sang missiles nga sarang makalab-ot sa China.
