ILOILO CITY – Daw indi matakos ang kalipay sang 45 ka stranded Overseas Filipino Workers nga ginrepatriate kag natalana nga magpauli sa Iloilo bwas sa kaagahon.
Sa interview sang Bombo Radyo kay Roel Piodena Jr., isa sa mga repatriated OFW iya ginpahayag nga nangin madasig ang proseso sang pagsakay nila barko kag wala sang nangin delay.
Suno kay Piodena daw kaangay nga ‘special’ ang ila nabatyagan bangud okupado nila nga mga Ilonggo OFW ang bilog nga barko kag wala na ini sang iban pa nga sakay.
Dugang sang natungdan, antes sila makasakay sa barko ginpaidalom sila sa Real-time Reverse Transcription Polymerase Chain Reaction test sa diin tanan sila ang nagnegatibo.
Matapos nila magpaidalom sa testing ginhatagan sila sang quarantine certificate nga amo ang nagapamatuod nga natapos nila ang 14 ka adlaw nga quarantine kag nagnegatibo sila sa nasambit nga balatian.
Nagpalab-ot naman sang pagpasalamat ang natungdan, kay Iloilo City Lone District Rep. Jam Jam Baronda nga amo ang nagpatigayon sang pag-repatriate sa ila kag naghatag sang ila mga kinahanglanon.
