ILOILO CITY- Nag- adoptar ang Senado sang resolusyon nga gin-file ni Senate Majority Leader Joel Villanueva nga nagahatag otoridad kay Senate President Juan Miguel Zubiri nga maghulag in behalf sang senado agud kwestiyunon ang constitutionality, validity kag irregularity sang proseso sang people’s initiative.
Ang Senate Resolution No. 920 ang gin-file kasunod sang nauna nga statement hali sa pinuno sang Senado nga plano sang upper house nga hangkaton ang legal nga mandato sang Commission on Elections sa pag-uyat sang people’s initiative.
Sa sentro sang pagkwestyon amo ang Article XVII, Section 2 sang 1987 Constitution kag Republic Act 6735, ukon ang “The Initiative and Referendum Act.”
Ang resolusyon ni Villanueva, kun maadoptar, ang magahatag kay Zubiri sang otoridad nga mag- file sang petitions nga nagakwestiyon sa People’s Initiative kag hingyuon ang serbisyo sang mga counsel para sadini nga petitions.
Ang tanan nga myembro sang senado ang ginhimo nga co-authors sang resolution matapos pormal nga gin-adoptar ang amo nga tikan sa Senate session kagab-i.
Wala naman sang senador nga nag-interpellate ukon nag- propose sang ano man nga amendment.
