ILOILO CITY- Nagpangabay ang chairman sang Senate Committee on Health kay newly appointed Department of Health Secretary Teodoro Herbosa nga unahon nga serbisyuhan ang mga pigado nga mga Filipino.
Sa interview sang Bombo Radyo kay Senator Christopher Lawrence ‘Bong’ Go, iya ginpahayag nga tuman ka kritikal ang sektor sang ikaayong lawas gani kinahanglan ini nga tutukan gid sang bag-o nga tiglikom.
Suno kay Senador Go, madamo sang mga pumuluyo nga halos wala gid sang ikasarang nga magbayad para maka-avail sang serbisyo- medikal kag nagalaum siya nga talupangdon ini ni Herbosa.
Ginpahayag naman ni Go nga dako ang pagsalig niya sa kapasidad ni Herbosa bangud nangin kabahin man ini sang inter-agency task force sa idalom sang administrasyon ni anay Presidente Rodrigo Duterte sang kasagsagan sang pandemya.
