ILOILO CITY – Nagluhod si Senator Ronald “Bato” dela Rosa sa isa ka senate hearing kag naghingyo sa iya former colleagues sa Philippine National Police agud lang nga magsugid sang matuod sa P6.7-billion drug haul sa Manila sang nagligad nga tuig.
Nagpangabay si Dela Rosa nga anay chief sang Philippine National Police kag chairman sang Senate Committee on Public Order and Dangerous Drugs, sa atubang sang mga pulis nga na-angut sa kontrobersiya agud nga isugid ang matuod sa likod sang pagka-aresto sa gin-dismiss nga si Police Master Sergeant Rodolfo Mayo Jr.
Si Mayo nga nagserbe nga intelligence officer sa Philippine National Police Drug Enforcement Group, ang gin-aresto matapos nga nakuhaan sang 990 kilograms sang suspected shabu nga may estimated value nga P6.7 billion sa sunud-sunod nga anti-drug operations sa Manila.
Suno kay Dela Rosa, ang iya pagluhod ang indi isa ka power tripping.
Nagpaumod siya agud nga pagwaon na sang mga pulis ang matuod para sa ila nga mga anak.
Sa amo nga hearing, gin-contempt sang panel sanday Mayo kag ang iya supervisor nga si Lieutenant Colonel Arnulfo Ibañez.
Lakip man sa mga gin-contempt ang lima pa ka mga pulis nagikan sa Calabarzon region nga sanday Police Master Sergeant Carlo Bayeta, Patrolman Rommar Bugarin, Patrolman Hustin Peter Gular, Patrolman Hassan Kalaw, kag Patrolman Dennis Carolino bangud sa pagpamalibad sa pagpakigbahin sang impormasyon sa pag-aresto kay Mayo.
Una na nga ginpahayag ni retired Philippine National Police chief Police General Rodolfo Azurin Jr. nga wala sang plano nga tabunan ang kaso ni Mayo kag wala sang tuyo nga i-delay ang imbestigasyon sa kahilabtanan ni Mayo.
Nagpabutyag naman sang kalain sang buot si Senator Robin Padilla bangud nga daw kaangay nga gina-abuso na sang mga naulamid nga pulis sa P6.7-billion drug haul sa Manila ang ila kinamatarong nga maghipos nga nakasaad sa layi.
Suno kay Padilla, ginababoy na sang sini nga hilimu-on ang konstitusyon agud lamang nga matakpan ang ila nga ginahimo.
Ginhalimbawa man sini ang iya pag-atubang sa iya kaso sang nagligad nga mga tinuig, kun sa diin, ginserbehan gid niya ang iya nga sentensya.
