Gindeklarar sang Malacañang ang Septyembre 3 bilang day of national mourning para sa nagtaliwan nga Gawad Manlilikha ng Bayan awardee nga si Federico Caballero nga tumandok sang Calinog, Iloilo.
Sa Proclamation Order No. 678 nga gin-isyu ni President Ferdinand Marcos, Jr. kag pirmado ni Executive Secretary Lucas Bersamin, nakasaad nga dapat nga naka-half mast ang national flag (halin sunrise tubtub sunset) sa tanan nga government buildings kag installations sa bilog nga Pilipinas kag mangin sa luwas sang pungsod subong nga adlaw.
Kabahin ini sang pagkilala sang palasyo sa “outstanding commitment” ni Caballero sa preserbasyon sang cultural kag artistic heritage sang Panay Bukidnon.
Si Caballero ukon kilala man nga si “Nong Pedring” ang nagtaliwan sang nagligad nga Agusto 17 sa edad nga 88.
Ang ginhatag sa iya nga pasidungog sang Gawad Manlilikha ng Bayan ukon National Living Treasure Award sang 2000 amo ang ginakabig nga highest state accolade para sa isa ka Filipino folk artist nga ginalantaw nga katumbas na sa Order of National Artist.
Sa Calinog, kilala man siya nga “manughusay” kag isa gid sa nagtib-ong sa oral literature sang komunidad partikular na ang sugidanon ukon ang koleksyon sang 10 ka epiko nga mabatian sa isa ka complex kag archaic poetic language nga isa man sa ginabantayan sa Dinagyang Festival.
Halin sang Septyembre 1, may mga ritwal na ang Panay Bukidnon nga gin-perform sa Garangan, Calinog, Iloilo bilang pagkilala sa iya.
Subong nga Septyembre 3 ang state funeral nga magasugod 9:00 sa aga sa amo man nga banwa, kag igabalik siya sa Garangan agud nga ilubong sa family cemetery.
