Ginbuyagyag ni Senator Imee Marcos nga naglapta pa sa iban nga mga rehiyon ang signature campaign agud iduso ang charter change paagi sa people’s initiative kag may yara pa sang bayad nga nagdangat na sa P1,000 kada pirma.
Suno sa senadora, may kabug-usan nga P20 million nga ginatanyag sa local officials agud nga tipunon ang pirma nga kinahanglan para lamang maduso ang cha-cha.
Ang pinakamataas nga bayad suno sa presidential sister amo ang P1,000 samtang P40 naman ang pinakamanubo sa pila ka bahin sang Luzon.
Lapnagon na ang amo nga kampanya suno kay Marcos kag may kaangay man sini nga hitabo sa Metro Manila, Ilocos, Central Visayas, Eastern Visayas, kag Zamboanga Peninsula.
Mangin si Sen. Sherwin Gatchalian ang nagsiling man nga may nasuguran naman nga signature campaign sa Valenzuela, apang wala lamang gin-abi-abi sang mga residente.
Una na nga ginsiling ni Albay Rep. Edcel Lagman nga ang mga coordinators sang Ako Bicol party-list ang nagapaguwa sang pondo sang Enero 5.
Ini nga pondo amo ang gina-alegar nga gamiton para sa pagpanagtag sang P100 kada botante para mapirmahan ang petition nga amyendaran ang 1987 Constitution paagi sa people’s initiative.
Ang Catholic Bishops Conference of the Philippines (CBCP) ang una naman nga nagpanawagan sa mga tumuluo nga ibasura ini nga signature campaign sa Charter change.
Nahibaluan nga mapatigayon lamang ang charter change paagi sa Congress, constitutional convention, ukon paagi sa people’s initiative nga mahimo kun may petition sang at least 12 percent sang total number sang registered voters.
Kada legislative district ang dapat nga matiglawas sang at least 3 percent sang registered voters.
Sa subong, may yara sang masobra 67 million registered voters sa Pilipinas.
