Nagakahangawa sa karun ang Archdiocese of Jaro bangud sa naganubo nga numero sang mga kaparian sa probinsya sang Iloilo.
Sa interview sang Bombo Radyo kay Rev. Fr. Angelo Colada, Director sang Social Communication sang Archdiocese of Jaro, iya ginpakigahain nga madamo sa karun sang mga parochial church sa probinsya sang Iloilo ang nagaproblema sa kakulangan sang pari.
Dugang pa ni Fr. Colada nga masami nagaka-delay ang mga misa sa iban nga simbahan bangud wala sang mga pari nga magapatigayun sang misa.
Ginapanan-aw ni Fr. Colada ang problema pinansyal bilang isa sa mga rason sa pagnubo sang numero sang mga pamatan-on nga nagasulod sa pagka-pari.
Matandaan nga nagpadulong si Jaro Archbishop Most Rev. Midyphil Billones D.D. sa Northern Iloilo, particular sa Gigantes Island bangud sa panawagan sang isa ka tumuluo nga hatagan sang pagtamod ang pumuluyo sang Carles, Iloilo bangud halos wala sang pari sa amo nga lugar.
Bangud sini, nagsaulog sang Semana santa si Archbishop Billones sa isla Gigantes, kun sa diin mainit gid ini nga gin-abi-abi kag ginpasalamatan sang mga pumuluyo.
Sa karun, nagahimo sang nagkalain-lain tikang ang Archdiocese of Jaro, ilabi na ang pagpatigayun sang scholarship programs sa mga pamatan-un nga tuyo magsulod sa bokasyon sang pagka-pari agud nga mahatagan ang mga ini sang kahigayunan kag masolosyunan ang naganubo nga numero sang mga kaparian.
