Ginalantaw sang Iloilo Provincial Government ang indi mapaiway nga pagtililipon ukon social gatherings ang rason sa gihapon sang pagtaas sang kaso sang COVID-19 sa probinsya sang Iloilo apisar napaidalom sa modified enhanced community quarantine (MECQ).
Isa sa gina-cite nga halimbawa amo ang natabo sa Malangabang — isa ka island barangay sa banwa sang Concepcion kun sa diin nakatipon sa namatyan ang mga pumuluyo kag ulihi na nahibaluan nga naglatnanay sang virus rason nga ginpaidalom sa surgical lockdown ang masobra 100 ka mga puluy-an.
Sa interview sang Bombo Radyo kay Iloilo Governor Arthur Defensor Jr., iya ginpahayag nga isa man subong sa ginatutukan amo ang workplace sang mga tawo nga amo man ang source sang transmission.
Padayon man subong nga ginahulat ni Defensor ang permiso halin sa National Inter-Agency Task Force agud nga mapatuman na ang ‘targeted’ COVID-19 vaccination sa Guimbal, Oton, Sta. Barbara, Leganes, kag Pavia nga may mataas nga positivity rate sang COVID-19 cases.
Ginalantaw nga importante ang pagbakuna sa economic frontliners sa sini nga mga lugar bangud sila ang naga-gwa kag nagatrabaho adlaw-adlaw.
Sa pinakaulihi nga record sang Iloilo Provincial Health Office, may yara sang 2,807 nga active cases ang probinsya sang Iloilo kun sa diin 37 ang new cases kag 183 ang new recoveries.
Ang lima naman sa nagapanguna sa pinakamataas nga kaso halin sang Enero tubtob Hulyo subong nga tuig amo ang Passi (799 cases), Oton (773 cases), Santa Barbara (590 cases) , Pavia (549 cases), kag Miagao (473 cases).
