Nagapakig-angot na sa Senado ang dugang mga biktima kag incumbent members sang Socorro Bayanihan Services, Inc. agud nga magtestigo batok sa mga lider sang gina-alegar kulto sa Sitio Kapihan, Socorro, Surigao del Norte.
Ginpahayag ini ni Sen. Risa Hontiveros, chairperson sang Senate Committee on Women, Children, Family Relations and Gender Equality, kasunod sang joint Senate Committee inquiry sang nagligad nga Huwebes nga nagtutok sa diskusyon sa gina-alegar pagpanghimulos, sekswal nga pagpang-abuso, pagpang-abuso sa mga kabataan, kag pagpamilit sa pagpakasal nga pila lamang sa iligal nga mga aktibidad sa amo nga sitio.
Ginapahayag man nga yara na subong sa kustodiya sang Department of Social Welfare and Development (DSWD) ang tatlo ka menor de edad nga luyag ipresentar sang lider nga si Jey Rence Quilario ukon “Senior Agila” bilang ila kaugalingon nga mga testigo.
Handa man ang Inter-Agency Council Against Trafficking — sa pagpamuno ni Secretary Jesus Crispin Remulla sang Department of Justice (DOJ) — nga ipaidalom ang mga kabataan sa ila nga protective custody.
Kun balikan, kasunod sang hearing sang Huwebes, gin-detain sa Senado sanday Senior Aguila kag ang tatlo ka iban pa lider sang grupo nga amo sanday Janeth Ajoc, Karren Sanico, kag si Mamerto Galanida nga isa ka three-term mayor sang Soccoro kag nagpungko man anay bilang board member.
Pareho sila nga nagpanginwala nga may pilitay sa pagpakasal nga nagakatabo sa Sitio Kapihan, Socorro — baliskad sa mga testimoniya sang mga kabataan nga amo ang nagpungko nga testigo sa Senado.
Suno sa victim survivors, si “Senior Agila” ang ila ginkabig nga “manluluwas” kag “diyos” kag amo man ang naga-facilitate sang pagpakasal sa mga menor de edad.
Ginpahayag nga tuman ang ila kahadlok nga indi sila magpati sa pagsulundan ni Senior Agila bangud ginapahog sila nga indi makasulod sa langit.
Ang nagapamalibad nga magpakighilawas sa ila mga bana ang wala man ginapasulod sa gate sang ila nga komunidad samtang ang iban naman nga nagalapas sa pagsulundan, suno kay Hontiveros, ang ginapalangoy sa “aroma beach” nga puno sang ihi kag higko sang tawo. #
