ILOILO CITY- Brutal nga kamatayon ang naagom sang isa ka solterito sa Barangay Aquino-Nobleza East, Janiuay, Iloilo matapos nga ginbuno kag ginlihapan pa ang iya butkon sang suspek.
Ang biktima amo si Christian Loraña, 15 samtang ang suspek amo si Mateo Renovar nga lunsay residente sang amo nga lugar.
Sa interview sang Bombo Radyo kay PCPT Alwin Salmon, hepe sang Janiuay Municipal Police Station, iya ginpahayag nga base sa ila pagpangusisa, nagapungko ang biktima sa kilid sang dalan sang hinali lang nga ginpalapitan sang suspek kag ginbuno sang makapila ka beses.
Gindala pa ang biktima sa Janiuay District Hospital apang gindeklarar nga dead on arrival sang doktor.
Naaresto naman ang suspek kag narekober sa iya ang kutsilyo nga gin-gamit sa krimen.
Ginpahayag nga may diperensya sa paminsaron ang suspek.
