ILOILO CITY- Kalain sang buot kag pagsunggod sa ginikanan ang ginalantaw nga rason sang pagpanginmatay sang isa ka solterito nga ginluthang ang iya kaugalingon sa Brgy. Pajo, Zarraga, Iloilo.
Ang biktima nagaedad sang 17-anyos, isa ka Grade 8 student, residente sang amo man nga lugar.
Sa interview sang Bombo Radyo kay PCpt Raphy Señeres, hepe sang Zarraga Municipal Police Station, iya ginpahayag nga base sa ila pagpangusisa, madugay na nga nagasunggod ang biktima sa iya amay bangud kaangay nga mas ginapaboran sini ang isa man niya ka anak.
Suno kay Señeres, sang nagpauli kagab-i ang solterito nga hubog, ginsaway ini sang iya amay kag makaligad lang ang pila ka minutos, nagkuha ini sang armas-luthang.
Gintinguhaan pa sang magulang sini nga utod nga agawon ang armas apang antes pa niya makuha, natigayon gid ini nga napalupok sang solterito.
Gindala pa ini sa ospital apang ginbawian gid sang kabuhi.
Ginapangita naman subong ang armas bangud ginpahayag nga matapos ang insidente, ginhaboy ini sang iloy sang biktima.
Sa interview naman sang Bombo Radyo sa iloy sang solterito, iya ginpahayag nga gin-ulu-uluhan pa niya ang iya anak antes ang insidente kag ginpaathagan nga alalangay ang ila pagkabig sa ila nga mag-utod.
