Ginalantaw nga magapanguna na ang Warriors star guard nga si Stephen Curry sa mag-angkon sang pinakadaku nga kuwarta sa National Basketball Association (NBA) players subong nga season kun basehan ang sweldo sa guwa kag sulod sang court.
Si Curry nga amo ang all-time leader sang liga sa three-pointers ang ginalauman nga makapasulod sang $155.8 million base sa report sang Sportico nga mas mataas pa sa $133.7 million nga maangkon naman sang Los Angeles Lakers star nga si LeBron James.
Wala sang bisan isa ka player nga nakaangkon sang mas madamo nga kuwarta ipaanggid kay James sa nagligad nga 11 ka seasons sang NBA. Ang anay basketball superstar nga si Kobe Bryant halin man sa Lakers amo ang ulihi nga mas mataas kay James apang natabo ini sang nagligad pa nga 2012-13.
Magluwas sa mga kumpaniya nga gina-endorso ni Curry nga JPMorgan Chase, Panini kag Fanatics, may yara man siya sang media business kag may capital firm nga magadugang sa iya nga bankroll.
Si Kevin Durant sang Phoenix Suns ($97.9 million) ang on track nga mangin fourth-highest earner sa 2024-25 campaign nga napatung-an nanday Milwaukee Bucks star Giannis Antetokounmpo (third-highest earner nga may $103.8 million) kag Damian Lillard (fifth highest nga may $66.8 million).
Kahapon sang pormal na nga nagsugod ang panibag-o nga regular season sang NBA kun sa diin sa opening-night contests, ginlutos sang Lakers ang Minnesota Timberwolves, 110-103, samtang ginpierde naman sang defending champions nga Boston Celtics ang New York Knicks, 132-109.
