Ginpasaka na ang panumbungon nga murder batok sa driver sang sports utility vehicle (SUV) nga nag-arado sa Lapu Lapu Day festival sa Vancouver, Canada nga gintambungan sang mga Pilipino.
Eight counts sang second-degree murder ang ginapangatubang sang suspek nga ginhingadlan nga si Kai-Ji Adam Lo, 30, residente man sang Vancouver. Posible pa nga madugangan ini nga charges suno pa sa otoridad.
Natabo ang insidente pasado alas otso sa gab-i oras sa amo nga lugar sang hinali lang nga nag-abot ang black Audi SUV sa East 43rd Avenue kag Fraser Street.
11 ang patay kag masobra 20 ang pilason sandig sa latest data halin sa pulis.
Pahayag sang pulisya, singko anyos ang edad sang pinakabata nga biktima, samtang 65-anyos naman ang pinakatigulang.
Wala pa sang ginpaguwa nga statement ang pulis sa motibo apang gindugang nga kilala nila ang suspek nga may history sang mental health-related interactions sa mga otoridad.
Ginpahayag man sang otoridad nga kumpyansa sila nga indi ini isa ka akto sang terorismo.
Sandig pa sa Vancouver Police Department Major Crime Section, nagapadayon pa ang imbestigasyon subong, kag nagahingyo man ini sa publiko nga maghatag sang dugang nga impormasyon sa krimen.#
