Natigayon na nga nadakpan sang Sara Municipal Police Station ang suspek nga nagpatay sa isa ka iloy kag naghimulos sa menor-de-edad sa Brgy. Arante, Sara, Iloilo.
Ang biktima amo si Grace Asiwagan Fortaleza, 44-anyos, residente sang nasambit nga lugar.
Ginaalegar naman nga ginhimuslan sang suspek ang 17-anyos nga hinablos sang biktima matapos ginhimo ang krimen.
Ang suspek amo si Ricardo “Ricky” Teruel, 34-anyos, residente sang Villa Hermosa, Sara, Iloilo.
Sa interview sang Bombo Radyo kay Sara, Iloilo Mayor Jon Aying, iya ginkumpirma nga nadakpan ang suspek paagi sa ginpatigayon nga hot pursuit operation sang kapulisan kag sa pagpanguna sang hepe sang Sara Police Station nga si Police Major Joegen Suegay.
Suno kay Aying, pasakaan sang legal nga kaso ang suspek buwas nga adlaw.
Una na nga ginhingyo sang alkalde sa kapulisan ang maid-id nga imbestigasyon kag madasig nga operasyon agud madakop ang suspek.
Sa subong, yara sa kustodiya sang kapulisan ang suspetsado samtang nagapadayon ang imbestigasyon sa natabo nga krimen.
Nahibaluan nga nagakatulog sa balay ang mga biktima, kon sa diin ginapahayag nga ginsulod sang suspek ang hulot paagi sa bintana.
Ang pagpati naman sang ila pamilya amo ang tuyo sang suspek nga himuslan ang 17-anyos nga dalaga, apang sa amo nga tion, nakabugtaw si Grace kag ginlamposan sang suspek agud nga indi na makapangayo pa sang tabang.
Nag-agum sang pilas sa guya kag sa baba ang iloy, kon sa diin nayupok gid ang piyak nga bahin sang guya sini.
Padayon naman gina-establisar sang kapulisan kon ang tuyo sang suspek amo ang himuslan ang menor-de-edad ukon patyon ang biktima nga si Grace.
