Gin-appoint ni President Ferdinand “Bongbong” Marcos, Jr. ang suspended lawyer nga si Lorenzo “Larry” Gadon bilang presidential adviser on poverty alleviation.
Suno sa Presidential Communications Office, ang appointment kay Gadon ang nagapakita lamang sang commitment sang gobyerno nga solbaron ang isa sa mga problema nga nagakinahanglan sang gilayon nga solusyon.
Tutukan ni Gadon ang pag-abiso sa presidente sa mga strategies kag policies agud nga mabatuan ang kapigaduhon kag mapanami ang kabuhi sang halos kalabanan nga vulnerable sectors sang sosyudad.
Ginpatpat man sang opisina ang mga eksperyensya ni Gadon bilang “corporate executive kag legal counsel” sa nagkalain-lain nga patag nga suno sa ila, makabulig sa paghimo sang poverty alleviation strategies.
Ini ang ginalakipan sang manufacturing, information technology, realty development, healthcare, resorts and hotels, construction, and trading.
Matandaan nga ginsuspinde sang Korte Suprema si Gadon bangud sa verbal assault sini sa isa ka journalist sang 2021.Kilala siya nga nagapamuyayaw, nagainsulto, kag nagatawag nga mango sa iban nga mga tawo partikular na sa mga kritiko ni former President Rodrigo Duterte.
Si Gadon ang nagpadalagan man bilang senador sa tatlo ka sunod-sunod nga eleksyon, kag sang nagligad nga tuig nalakip sa slate ni President Marcos kag Vice President Sara Duterte apang wala gihapon ini nagdaog. #
