SWEDEN – Magapaidalom sa mass testing ang bilog nga Sweden bangud sa padayon nga pagsaka sang kaso sang Coronavirus Disease 2019.
Suno kay Bombo International Correspondent Eralyn Lundin, direkta sa Sweden iya ginpahayag nga maga sugod na ang mass testing sa kada rehiyon sa nasambit nga pungsod.
Dugang sang natungdan, ginatan-aw nga rason kun ngaa madasig ang pagsaka sang Covid-19 sa nasambit nga pungsod amo bangud wala sang ginapatuman nga pagsulundan ang Swedish government batok sa virus kaangay nalang sang pagsuksok sang gloves kag mask kun maggwa.
Sa pagkamatuod suno kay Lundin, wala sang baligyaan nga mahimo mabaklan sang facemask bangud wala ini sang stock sa Sweden.
Santo sa pahayag ni Lundin, sila nalang mismo ang nagahimo sang pamaagi agud maprotektahan ang ila kaugalingon batok sa makamamatay nga balatian.
Sa subong, nagdangat na sa 16,004 ang kaso sang Covid-19 sa Sweden sa diin 1,937 na ang nagkalamatay kag 550 ang nakarecover.
