ILOILO – Nagpabutyag sang pagkasubo ang tagdumalahan sang Run for Jesus 2020 matapos nga ginpaiway sang Iloilo City Government ang pagpatigayon sang nasambit nga kahiwatan.
Sa interview sang Bombo Radyo kay Dr. Robert Sineneng, Chairman sang Organizing Committee sang Run for Jesus 2020 iya ginpahayag nga dismayado sila sa pagkanselar sang ila nga event bangud sa pagkamatuod gintinghuaan gid nila nga tumanon ang tanan nga pagsulundan nga ginhatag sang Department of Health .
Suno kay Sineneng, ang Department of Health mismo ang nagpahayag nga safe nga magpatigayon sang event basta sundon lang nila ang guidelines for sanitation nga ila ginhatag gani dako ang ila pagsalig nga madayon ang nasambit nga kahiwatan.
Dugang sang natungdan, ginpanugyanan naman nila ang mga bisita nila nga Korean nationals nga indi na magpadulong sa Lapaz Plaza agud magtambong sang event sa baylo nga magpabilin nalang sa ila tagsa ka mga hotel agud lang madayon ang kahiwatan.
Santo man sa pahayag ni Sineneng, may yara sang medical certificate ang 35 nila ka mga bisita nga Korean nationals nagikan sa ila mga doktor nga nagapamatuod nga negatibo sila sa COVID-19 kag nakaabot na sila sa Pilipinas bag-o pa man magluntad ang outbreak sang nasambit nga virus sa Daegu City.
Apang ginkakibot lang nila nga ginpaiway ang pagpatigayon sang Run for Jesus 2020 bangud malawig na ang ila preparasyon kag dako naman ang ila nagasto para sa pagpatigayon kun tani sang nasambit nga kahiwatan.
Gin-athag man ni Sineneng nga wala sila sang patigayunon nga aktibidad sa dalan kabaliskaran sa ginpahahayag ni Iloilo City Councilor Alan Zaldivar bangud indi man fun run ang Run for Jesus 2020.
Pagpaathag sang natungdan, ang City government mismo ang nagpatuman sang road closure bangud sa gina ekspektar nga kadamuon sang mga tawo nga magatambong sa kahiwatan.
