ILOILO CITY – Ginpaiway na ang pila ka mga pagtililipon kag kahiwatan sa banwa sang Concepcion bangud man sa kahangawa sa Coronavirus Disease 2019.
Sa interview sang Bombo Radyo kay Concepcion Mayor Dr. Raul Bañas, iya ginpahayag nga nagpapanaog na siya sang mandu bilang pagsuporta man sa ginpapanaog nga Executive Order ni Iloilo Governor Arthur Defensor Jr., may kaangtanan sa pagpaiway sang mga dalagko nga pagtilipon kag kahiwatan.
Suno kay Bañas, nakasaad sa nasambit nga mandu ang pagpaiway man sang mga dalagko nga kahiwatan sa ila nga banwa tubtob Abril 12 kaangay nalang sang bulang, binayla, koronasyon kag pista.
Lakip man sa ginpaiway amo ang Tampisaw Festival nga ginapatigayon kada Abril 24-26.
Santo sa pahayag ni Bañas, ginpakamaayo nila nga ipaiway nalang ang nasambit nga kahiwatan agud malikawan nga maglapta ini kag matapikan ang mga pumuluyo sa ila nga banwa.
Hugot man ang pagpatuman sang mga lihok batok sa COVID-19 sa ila nga banwa ilabi na nga may yara sila sang mga island barangay nga mahimo mangin entry point sang mga dumuluong nagikan sa mga pungsod nga apektado sang nasambit nga balatian.
Isa sa mga lihok nga ginapatigayon nila amo ang pagpahamtang sang thermal scanner entrance sang ila nga munispyo sa diin maga-agi ang tanan nga nagasulod.
May yara man sang nakahamtang sa mga terminals sang salakyan kag RORO buses.
Naka-alerto naman nila ang mga kabarangayan sa ila nga banwa sa diin ginamonitor nila ang mga pumuluyo nga may history of travel sa iban nga pungsod.
Suno sa alkalade, apisar nga wala sang ‘flu like symptoms’ ang mga may yara sang travel history sa gwa sang pungsod kabigon man sila sa gihapon nga persons under monitoring kag igapaidalom sa quarantine kag i-monitor sang mga Barangay health workers.
Ginpanugyanan naman sang alkalde ang mga planta sa ila nga banwa sa diin may yara sang mga trabahador nga nagikan sa China nga i-monitor ang ila mga empleyado ilabi na ang mga Chinese.
Nagpasalig naman si Bañas nga hilway ang halos 80 ka mga Chinese worker sa power plant sa ila nga banwa bangud padayon sila nga gina monitor sang Local Government Unit.
Sa pagkamatuod suno kay Bañas, ang kompanya mismo sang planta ang istrikto nga nagapatuman sang mga lihok agud masiguro nga mangin hilway ang tanan nila nga mga empleyado.
Sa diin wala na nila ginpabalik pa ang mga trabahador nila nga Chinese nga nagpauli sa China agud mag selebrar sang Chinese New Year.
Dugang pa, may yara man sang barko nga may sakay nga Indonesian ang nagadungka sa Concepcion agud mag deliver sang coal.
Suno kay Bañas, wala na niya gintugutan nga makapanaog ang mga crew sang Indonesian nga barko lakip man ang pagpasaka sang nasambit nga barko.
Sa baylo, ang mga katapo nalangs ang Bureau of Quarantine nalang ang magakuha sang ila mga deliveries.
