100 ka mga balay sa Barangay Calaparan, Arevalo, Iloilo City ang prone sa halit nga tuga sang mabaskog nga hangin kag dalagku nga mga balod.
Sa interview sang Bombo Radyo kay Barangay Kagawad Rodrigo Montaño, iya ginpahayag nga ini nga mga balay ang naka-posisyon gid sa atubang mismo sang baybay.
May 300 man ka balay suno kay Montaño nga kaiping pa gid sini nga 100 ka puluy-an kag ginamonitor man sang maayo sang mga barangay officials.
Gin-athag sang opisyal nga subong, tatlo ka balay sa ila nga barangay ang nawasak lakip na diri ang duha ka balay nga naguba kag una na niya nga ginkumpirma kahapon sang aga.
Una naman nga nag-abiso ang barangay officials nga kun magpadayon pa ang paglain sang tyempo, dapat na nga mag-evacuate ang mga pumuluyo sa designated evacuation centers nga amo ang eskwelahan kag ang barangay hall.
Sa subong, santo sa pinakaulihi nga rekord sang Iloilo City Disaster Risk Reduction and Management Office (CDRRMO), magluwas sa tatlo ka balay nga naguba sa Barangay Calaparan sa Arevalo, tatlo man ang nawasak sa Barangay Rizal Ibarra, Iloilo City Proper kag apat ang may porsyon nga nahalitan; isa ka balay ang nawasak sa Barangay Ortiz, Iloilo City Proper; kag isa ka balay ang may porsyon nga nahalitan sa Barangay Bo. Obrero sa distrito sang Lapuz.
