Gin-klaro ni newly-appointed Agriculture Secretary Francisco Tiu Laurel Jr. nga wala siya nakatapos sa iya nga pag-eskwela — baliskad sa nauna nagguwa nga mga impormasyon nga nag-graduate siya halin sa University of Santo Tomas.
Suno sa tiglikom, sa edad nga 19, nangin isa na siya ka amay gani ginpasulabi niya ang pag-trabaho agud mahatag ang kinahanglanon sang iya pamilya.
Gindugang sini nga kaangay sa iban, nangin handum man niya nga magsuksok sang toga kag makabaton sang diploma, apang wala ini natabo bangud sa baylo, ang dagat amo ang iya nangin unibersidad; ang eskpersyensya sa kabuhi ang nagtudlo sa iya sang balor sang paghimakas; kag ang iya kabataan ang naghatag sa iya sang inspirasyon kag kaisog tubtub nga naabtan niya ang iya estado subong.
“Like many, I dreamt of wearing a toga and receiving a diploma. But that wasn’t meant to be… The sea became my university, experiences in life taught me the value of perseverance. My children gave me the courage and inspiration to get to where I am now,” kabahin sang statement sang tiglikom.
PHOTO: PCO
Antes sini, nagpaguwa sang report ang The Varsitarian nga official student publication sang UST nga sandig sa rekord sang Office of the Registrar, wala naka-graduate si Laurel kag wala sang nakuha nga undergraduate studies sa amo nga unibersidad.
Ginbali sini ang nauna nga mga impormasyon nga computer science alumnus sang amo nga unibersidad ang nasambit nga opisyal.
Nobyembre 3 sang gin-appoint ni President Ferdinand Marcos Jr. si Laurel bilang tiglikom sang Department of Agriculture.
Antes sini, siya ang presidente sang Frabelle Fishing Corp. nga isa ka fishing company sa Navotas.
Base sa nauna nga reports, nauyatan man niya ang mga posisyon sa Gravelle Shipyard Corp., Frabelle Properties Corp., Markham Resources Corp., Bacoor Seafront Development Corp., kag Bukidnon Hydro Energy Corp.
