Nagpaguwa na sang iya statement si President Joe Biden kasunod sang inadlaw na nga protesta sang pro-Palestinians sa mga dalagku nga unibersidad sa Estados Unidos sang Amerika nga naangot sa nagapadayon nga gyera sa tunga sang Israel kag Hamas.
Suno kay Biden, may kinamatarong ang tanan nga mag-protesta apang wala sang kinamatarong nga magtuga sang ginamo.
“There is a right to protest, but not a right to cause chaos,” pahayag sini sa White House.“Destroying property is not a peaceful protest. It’s against the law. Vandalism, trespassing, breaking windows, shutting down campuses, forcing the cancelling of classes and graduations – none of this is a peaceful protest.”
Gin-athag man sang presidente nga indi ini pabor nga ipadala ang tropa sang national guard sa mga eskwelahan kaangay sang suhestyon sang prominente nga mga Republican lawmakers.
Wala man nagpaathag ukon nagdepensa si Biden sa mga polisa sang iya nga administrasyon kaangot sa opensiba sang Israel sa Gaza.
Wala man ini sang ginhatag nga rason kun ngaa dapat na mag-untat sa pagprotesta ang mga estudyante, apang nagbilin ini sang paandam nga kun sin-o man ang mag-sulubra sa demonstrasyon, mahimo magpangatubang sang kunsekwensya.
Nahibaluan nga masobra na sa 2,000 ang naaresto sang mga pulis bangud sa lapnagon nga protesta sa college campuses nga nagsugod sang Abril 18.#
(Photo: Forbes)
