19 ka mga Filipinos ang magapartisipar sa 11 ka mga hampang subong nga 2020 Tokyo Olympics.
Ang Olympic team sang Pilipinas ang ginalakipan sang mga masunod: Ernest John Obiena sa athletics, Carlos Yulo sa gymnastics, Eumir Felix Marcial sa boxing, Irish Magno sa boxing, Nesthy Petecio sa boxing, Carlo Paalam sa boxing, Hidilyn Diaz sa weightlifting, Cris Nievarez sa rowing, Kurt Barbosa sa taekwondo, Margielyn Didal sa skateboarding, Elreen Ando sa weightlifting, Jayson Valdez sa shooting, Juvic Pagunsan sa golf, Kiyomi Watanabe sa judo, Kristina Knott sa athletics, Yuka Saso sa golf, Bianca Pagdanganan sa golf, Luke Gebbie sa swimming kag Remedy Rule sa swimming.
Sa 11 ka sports nga pasakupan sini nga mga atleta, ginalauman nga makuha sang pungsod ang labing-una nga gold. Isa ka adlaw antes ang opening ceremony, nagdesisyon ang Philippine Olympic Committee (POC) nga papaulion ang isa ka coach nga lakip sa Tokyo Olympics delegation matapos nga nagpositibo ini sa COVID-19.
Ipaidalom pa ang amo nga coach sa isa pa ka round sang COVID-19 testing apang nangin pinal ang desisyon sang national Olympic committee nga pabalikon ini sa Pilipinas — positibo man ukon negatibo ang resulta sang retest. Subong nga adlaw, Hulyo 23, ang opening ceremony sang Tokyo Olympics matapos isa ka tuig nga nakanselar bangud sa pandemya.
