ILOILO CITY- Naplastar na sang Local Government Unit sang Jordan ang ila ipatuman nga sistema sa ginalauman nga pagdagsa sang mga tawo agud magpadulong sa Balaan Bukid subong nga Huwebes Santo kag Biyernes Santo agud saksihan ang Pagtaltal sa Guimaras.
Ini amo ang reenactment sang kasakit, pag-antos, kag pagkamatay ni Hesus sa krus.
Sa interview sang Bombo Radyo kay Punong Barangay Faith Dellavan sang Brgy. Hoskyn, Jordan, iya ginpahayag nga may yara sila nga ipatuman nga traffic plan agud nga mas ma-manage sang maayo ang mga salakyan, pribado man ukon pampubliko.
Suno kay Dellavan, may yara man sang mga ambulansiya nga gamiton sa tion ang emerhensiya kag may iban man nga ahensya sang gobyerno nga magabulig ilabi na ang Philippine National Police kag Coast Guard.
