ILOILO CITY – Dapat nga ipaathag sang MORE Electric and Power Corporation (MORE Power) sa Sangguniang Panlungsod ang rason sang pagluntad sang asud-asud nga brownouts sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga nakigsapol na sa iya si Roel Castro, presidente sang MORE Power, agud ipaathag ang natabo nga June-20-unscheduled-brownout sa Mandurriao area kag iban pa nga lugar sakop sang Feeder 4 sang Mandurriao Substation.
Suno kay Treñas, gintumod ni Castro nga rason ang mga mayor nga linya nga nautod kag halog nga transformer.
Ginpahayag man ni Treñas nga plano sang nasambit nga power distributor nga idangop sa National Bureau of Investigation (NBI) ang ginapahayag “pagpangsabotahe” sa power interruptions sa syudad sang Iloilo.
Suno sa alkalde, indi siya electrical engineer kag judge nga mahimo magtumod kun may yara gid man sang natabo nga “pagpangsabotahe” base sa alegasyon sang MORE Power nga nagapatungod sa Panay Electric Company (PECO).
Sa subong, suno kay Treñas, mas maayo kun madangop man sang MORE Power sa Iloilo City Council ang problema nga nag-umpisa sang gintake-over nila ang electricity distribution services sang tinalikdan nga Pebrero.
