ILOILO CITY- Nagakadapat nga imbestigaran sang national government ang Philippine Coast Guard – Cebu may kaangtanan sa pagpahanugot sa mga locally stranded individuals (LSIs) nga makapauli sa Iloilo.
Ini ang pahayag ni Iloilo City Mayor Jerry Treñas matapos 55 ka mga pasahero ang sakay sang barko sang Cokaliong kag nagdungka sa Philippine Ports Authority (PPA) Terminal sa Fort San Pedro, Iloilo City kahapon, Hunyo 22.
Suno kay Treñas, makatilingalahan kun ngaa wala nahangpan sang nasambit nga pamunuan ang mandu sang Department of the Interior and Local Government (DILG) nga untaton ang pag-repatriate sang mga LSIs bangud isa ka high-risk area ang Cebu nga may mataas nga numero sang COVID-19 cases.
Gin-athag naman sang natungdan nga nagalaom siya nga mahatagan ini sang nagakaigu nga atensyon apang indi na siya magpahilabot pa sa imbestigasyon.
