ILOILO CITY – Apisar nagahanda na ang Iloilo City Government para sa gradual lifting sang Enhanced Community Quarantine (ECQ) sa syudad sang Iloilo, sundon sa gihapon ang rekomendasyon sang national government.
Ini ang pahayag ni Iloilo City Mayor Jerry Treñas kasunod sang pag-anunsyar sang Inter Agency Taskforce Against Coronavirus Disease 2019 (COVID-19) subong nga adlaw nga nalakip ang Iloilo sa high-risk nga mga lugar sa diin dapat tsekyaron liwat ang posible pagpalawig sang ECQ.
Sa interview sang Bombo Radyo kay Treñas, iya ginpahayag nga madugay na niya ginasulit-sulit nga ang tanan nga desiyon may kaangtanan sa extension sang lockdown ang dapat i-base sa rekomendasyon sang nasambit nga pamunuan bangud indi niya luyag nga basulon ang syudad sa tion nga maglala pa ang sitwasyon bangud sang COVID-19.
Suno kay Treñas, kinahanglan gihapon ang bulig sang mga yara sa medical profession agud mahibaluan kun insakto man ang mga ginadihon nga plano sang mga opisyal sang syudad, negosyante, Philippine National Police (PNP), Land Transportation and Regulatory Franchising Board (LTFRB), kag iban pa nga otoridad.
‘PAGPAKIG-ANGOT SA IBAN NGA LIDER.’
May kaangtanan naman sa komunikasyon sa iban nga local chief executives sa Western Visayas, ginpahayag ni Treñas nga naka-istorya na siya kay Iloilo Governor Arthur Defensor Jr. kag pabor siya sa desisyon sini natuhoy sa transition nga himuon sa probinsya sa diin may yara sang bag-uhon sa scheme nga dapat ipatuman tuhoy sa posible pagpalawig sang ECQ.
Suno pa kay Treñas, wala pa niya naistorya ang iban nga mga gobernador bangud sa subong, ginatutukan niya ang pag-abot sang mga opisyal sang Department of Health (DOH) kag Research Institute for Tropical Medicine (RITM) sa West Visayas State University Medical Center (WVSU-MC) agud ma-accredit ang laboratory sang ospital para sa COVID-19 testing.
Pahayag pa ni Treñas, palawigon man ukon indi ang ECQ, importante nga mapatigayon sa gihapon ang mass testing kag mas mapadasig ini kun may magdugang nga accredited laboratory sa Rehiyon 6.
