Gin-arado sang truck ang duha ka mga motorsiklo kag duha pa ka mga salakyan sa New Site, Barangay San Miguel, Jordan, Guimaras subong nga hapon.
Sa interview sang Bombo Radyo kay Police Captain Kevin Bacongallo, hepe sang Jordan Municipal Police Station, iya ginpahayag nga naghalin ang mga salakyan sa Barangay Alaguisoc kag pakadto kuntani sa Barangay San Miguel sang pag-abot sa tubang sang pulic market sang amo nga banwa, nadulaan sang preno ang truck kag nabunggoan ang ginasundan sini nga duha ka motorsiklo.
Suno kay Bacongallo, bangud sa impact, nakaagum sang pilas kag gasgas sa tuo nga tiil ang driver sang isa ka motorsiklo.
Gilayon man ini nga gindala sa malapit nga ospital kag gindapatan sang nagakaigo nga pagbulong.
Nakadesisyon man ang tanan nga mga driver kag tag-iya sang mga salakyan nga maga-areglohanay nalang.
Article by: Bombo Hanna Andasa
