Igo sa na-wala nga bahin sang truck nga may karga nga tubo matapos nga nagpalupok sang armas ang isa ka barangay kagawad nga sakay sa Mitsubishi Xpander sa Brgy. Quinolpan San Enrique, Iloilo.
Ang barangay kagawad ang residente sang Brgy. Imbang Pequeño, San Enrique, Iloilo, samtang ang driver sang truck ang residente sang Brgy. Abaca, San Enrique, Iloilo.
Sa interview sang Bombo Radyo kay Police Lieutenant Cristi Val Dalde, hepe sang San Enrique Municipal Police Station, iya ginpahayag nga naghalin ang duha ka salakyan sa syudad sang Passi kag padulong kontani sa banwa sang San Enrique.
Suno kay Dalde, nagit-gitanay ang duha ka salakyan sa dalan rason nga nagtuga sang komosyon sa mga driver sini.
Sang nag-abot na ang duha ka salakyan sa nasambit nga barangay, gilayon nga ginpanaog sang driver sang Mitsubishi Xpander ang iya windshield kag gintiro padalom ang truck nga may karga nga tubo.
Gintuad ni Dalde nga ang trajectory sang bala ang nag-igo sa na-wala nga bahin sang truck.
Gilayon naman nga nagpalagyo ang driver sang Mitsubishi Xpander, apang, natandaan ini sang driver sang truck lakip na ang plate number.
Nagpatuman naman sang hot pursuit operation ang San Enrique PNP kag naabtan ang barangay kagawad nga driver nga yara na sa ila balay.
Natukiban man nga may impluwensya sang makahulubog nga ilimnon ang nasambit nga kagawad.
Ginpasakaan ini sang kaso nga attempted murder apang gilayon man nga nakapiyansa sa balor nga P40,000 to P50,000.
Wala naman narekober sang kapulisan ang armas nga gingamit sang barangay kagawad, kag wala man sang narekober nga bala sa lugar kon sa diin nagluntad ang insidente.
Ini man ang rason kon ngaa attempted murder lang ang napasaka sa barangay kagawad kag indi paglapas sa RA 10591 ukon ang Comprehensive Firearms and Ammunition Regulation Act in relation to Commission on Elections (COMELEC) gun ban.
