Gin-anunsyo ni US President Donald Trump nga sa Estados Unidos sang Amerika na magakuha ang Pilipinas sang 100% sang kinahanglanon nga mga produkto sa agrikultura kag enerhiya umpisa sa Enero 1 sa masunod nga tuig.

Sa press briefing sa White House, nagsiling si Trump nga ginpahibalo niya ang mga opisyal sang gobyerno sang Pilipinas sa iya nagligad nga state visit sa pungsod nga dapat sa Estados Unidos na magbakal ang Pilipinas sang tanan nga kinahanglanon sini nga agricultural products sa baylo nga magkuha sa iban nga pungsod pareho sang Brazil.

Suno kay Trump, 20% lamang sang agricultural requirements sang Pilipinas ang subong ginabakal sini halin sa Estados Unidos.

Ginbalikan man sang US President ang iya pag-istorya kay President Ferdinand Marcos Jr. kaangot sa ginakuhaan sang Pilipinas sang suplay sang enerhiya.

Suno kay Trump, nagsiling si Marcos nga nagakuha ang Pilipinas sang enerhiya halin sa Middle East, apang ginpahayag niya nga sa Amerika na dapat magbakal ang pungsod sang bug-os sini nga kinahanglanon nga enerhiya.

Madumduman nga gin-anunsyo ni Trump ang isa ka daku nga trade deal sa tunga sang Pilipinas kag Amerika pagkatapos sang ila bilateral meeting sang damlag lamang.

Nauna naman nga gin-athag ni Marcos nga ang katuyuan sang kasugtanan amo ang pagpasangkad sang ginakuhaan sang Pilipinas sang nagkalain-lain nga produkto, ilabi na ang pagkaon kag enerhiya.

Suno naman kay US Ambassador to the Philippines Jose Manuel Romualdez, gintanyag ni Trump nga buksan ang merkado sang Amerika para sa Pilipinas agud mapabakod ang seguridad sang pungsod sa suplay sang pagkaon kag enerhiya.

ANO ANG HAMBAL NI MARCOS?

Kun balikan naman ang paathag ni Marcos, ginsiling sini nga ang proposed arrangements indi makabig nga commitments nga baklon ang tanan nga Philippine food and energy requirements halin sa United States.

Pahayag sini samtang yara sa Shenzhen, China, ang ila pag-istoryahanay nagasakop sang mas masangkad nga pagbakal sang American agricultural products lakip na ang soybeans kag wheat kag amo man ang posible nga energy imports.

Gindugang sini nga iga-finalize pa ang detalye sang separado nga food and energy initiatives kag naga-coordinate pa ang government officials para sa implementation.

“The key takeaway there is that he (Trump) opened American markets to the Philippines when it comes to energy and food,” suno kay Marcos sa atubang sang reporters.#