Nagapadayon pa ang ginahimo nga assessment sang mga otoridad kasunod sang pagtay-og sang linog sa southwestern Japan kagab-i.
Suno kay Bombo Josel Palma, international correspondent sa Japan, nagpagwa sang abiso ang Japan Meteorological Agency (JMA) sa tsunami nga may kataason nga tubtob sa isa ka metro matapos nag-igo ang linog sa Miyazaki prefecture sa Kyushu region.
Apang, ginbag-o sang United States Geological Survey ang magnitude halin sa 6.9 sa diin ginhimo ini sa 6.8 kadungan sang pag-athag nga wala na sang tsunami threat halin sa linog.
Sa pihak sini, ginpanawagan sang mga otoridad sa publiko nga magpalayo sa baybayon.
May napilasan man sa insidente kag padayon nga ginabulong sa ospital.
