Ginbuksan sang Russia ang kaso-kriminal batok kay Ukrainian President Volodymyr Zelensky kag ginbutang man ini sang Interior Ministry sa wanted list.
Ini base sa online database sang gina-alegar nga mga kriminal nga ginalagas sang otoridad.
Suno pa sa database, wanted ang Ukrainian leader sa idalom sang criminal code, apang wala na sang dugang nga mga detalye.
Gintawag naman sang Ukraine nga wala sang pulos ang Russian announcement kag sa pagkamatuod si Russian President Vladimir Putin ang na-isyuhan sang warrant halin sa International Criminal Court (ICC) kag subject sa implementasyon sang 123 ka mga pungsod.
“We would like to remind you that unlike the worthless Russian announcements, an International Criminal Court warrant for the arrest of Russian dictator Vladimir Putin on suspicion of war crimes is quite real, and subject to implementation in 123 countries,” suno sa Ukrainian foreign ministry sa ila nga statement.
Dugang pa sang Kyiv, ang anunsyo sang Russia amo ang nagapakita kun ano ka-desperado ang Russian state machine kag propaganda kag wala na sang iban nga mapinsaran kun paano maka-agaw sang atensyon.
Nahibaluan nga halin sang Pebrero 2022, pila ka beses na nga nakapaguwa ang Russia sang arrest warrants sa Ukrainian kag iban pa nga European politicians.
Sang Pebrero, ginbutang man sang Russian police si Estonian Prime Minister Kaja Kallas, ang culture minister sang Lithuania kag members sang previous Latvian Parliament sa wanted list bangud sa pagguba sang Soviet-era monuments.#
