ILOILO CITY – Nagapadayon ang pagtukod sang United States government sang $2-million ukon P111 million nga fuel depot sa Mactan-Benito Ebuen Airbase sa Lapu-Lapu City, Cebu, isa sa mga existing sites sa idalom sang Enhanced Defense Cooperation Agreement (EDCA).
Suno kay United States Ambassador to the Philippines MaryKay Carlson, ang pagpatukod sang depot ang ginalauman nga matapos sa Oktubre.
Duha ka mga dalagko nga tanke ang ibutang sa amo nga depot agud nga mahimo nga makapadulong ang Philippine aircraft kag mag-refuel.
Pahayag pa sang envoy, ang fuel depot nga maka-stock sang 40, 000 liters sang gatung nga bastante para nga matughungan ang 10 ka mga C-130 planes, ang gamiton agud nga ma-enhance ang interoperability ang Philippine Air Force kag sang iya nga mga partners ilabi pa sang strategic location sang Mactan Island.
Dugang pa sang natungdan, ang military base ang iya sang Pilipinas, gani, ang Philippine Air Force ang makatumod kun sin-o ang mahimo nga maka-refuel.
Gin-athag man niya nga sa tion nga makumpleto na ang pagpatukod sang site, ini ang makapasanyog sang interoperability sa tunga sang United States forces kag Philippine forces apang ang site ang ginapanag-iyahan sang Pilipinas, kag indi sang Estados Unidos.
