Nagdonar ang Estados Unidos sang Amerika sang malapit P7 million ($125,000) para sa dugang nga proteksyon sa tawhanon nga kinamatarong sang mga Pilipino.
Natuon ini sa Philippines-United Nations Joint Programme for Human Rights.
Suno kay United States Ambassador to the Philippines MaryKay Carlson, dungog para sa Amerika nga malakip sa mga pungsod nga nagasuporta sa Pilipinas sa aspeto sang pagproteher sang kinamatarong sang mga pumuluyo kag pagtib-ong sa dignidad sang kada indibidwal.
Ginpaagi ang kontribusyon sa United States Agency for International Development kag amo ang magasuporta sa tatlo ka tuig nga human rights program nga magahatag sang safe spaces sa publiko kag sa pag-promote sang makatawo nga paagi sa pagkontrol sa iligal nga droga.
Lakip man diri ang pagpabaskog sang domestic investigation kag accountability mechanisms; data gathering sa gina-alegar nga nga pagpang-abuso sang mga pulis; civic space kag engagement sa civil society kag ang Commission on Human Rights kag counter-terrorism legislation.
Matandaan nga una na nga nagpromisa si United States President Joe Biden kay Presidente Ferdinand Marcos, Jr. sa Washington nga suportahan sang Amerika ang human rights sa Pilipinas.
Matandaan man nga sang ginlunsar ang joint human rights program sang 2021, nag-amot man ang Australia sang P12.9 million sa Pilipinas. #
