ILOILO CITY- Nagpatigayon sang pinakauna nila nga direkta nga pagpakigsugilanon sanday US President Joe Biden kag Chinese President Xi Jinping kun sa diin isa sa ila naistoryahan amo ang isyu sa West Philippine Sea.
Sa statement nga ginpagwa sang White House, ginpaandaman sang US president ang Beijing nahanungod sa nagainit nga komprontasyon sa West Philippine Sea nga gina-claim sang China kag nagalapas naman sa international law.
Suno sa senior administration official, ginmitlang ni Biden ang iya pagkabalaka sa delikado nga mga tikang sang China Coast Guard batok sa routine maritime operations sang Pilipinas.
Sa amo nga pag-istoryahanay sang duha ka mga presidente, katuyuan man ni Biden nga mapunggan ang pagsingki pa sang tensyon isa ka bulan antes ang presidential inauguration sa Taiwan sa Mayo.
Gin-gamit ni Biden ang kahigayunan nga maplastar kay Xi Jinping ang importansiya sang pagpabilin sang peace and stability sa Taiwan Strait kag ang rule of law kag freedom of navigation sa West Philippine Sea.
Nahibaluan nga gina-claim sang China ang Taiwan bilang kabahin sang ila teritoryo kag hugot naman nga ginakontra sang Taiwan ang sovereignty claims sang China.
Matandaan nga ang current Vice President sang Taiwan nga si Lai Ching-te, nga ginalantaw sang Beijing bilang separatist, amo ang nagdaug sa pagka- presidente sang Enero.
Magluwas sa sini nga mga isyu, gin- istoryahan man nanday Biden kag Xi ang tuhoy sa suporta sang China sa giyera sang Russia batok sa Ukraine.
