ILOILO CITY- Mas magalawig pa ang validity sang license to possess firearms and ammunition matapos ginpirmahan ni Presidente Rodrigo R. Duterte ang Republic Act (RA) No. 11766.
Ang RA 11766 nga nag-amyendar sang RA 10591 ukon Comprehensive Firearms and Ammunition Regulation Act nagasiling nga gikan sa duha ka tuig, mangin lima tubtob 10 ka tuig na ang validity sang lisensya.
Sa interview sang Bombo Radyo kay PLtCol Arnel Solis, spokesperson sang Police Regional Office 6, iya ginpahayag nga sa idalom sang bag-o nga layi, ang tanan nga lisensya sa pag-angkon sang armas, ano man ang classification, ang dapat i- renew kada lima ukon 10 ka tuig depende sa licensee, magluwas lang kun i- revoke ukon i-suspend.
Ang registration naman sang armas ang dapat i- renew kada lima ukon 10 ka tuig nga depende man sa licensee.
Ang kapaslawan nga pareho nga i-renew ang licenses to carry kag registration of firearms ang magaresulta sa pagbawi sang lisensya kag registration, kag confiscation sang armas.
Ang applications para sa renewal of license ukon registration ang mahimo nga ipasa sa Firearms and Explosives Office sang Philippine National Police sa sulod sang anom ka bulang antes ang expiration date sang licenses ukon registration.
Nasaad man sa layi nga sa bahin sang incumbent kag former elected officials kag aktibo ukon retirado nga military kag law enforcement personnel, sila ang exempted sa requirement sang threat assessment certificate sa pag-apply sang permit to carry firearms outside of residence.
Matandaan nga ang mga exempted sadto amo ang mga myembro sang Philippine Bar, certified public accountants, cashiers, bank tellers, pari, ministers, rabbi, imams, physicians, nurses, engineers, kag mga businessmen nga bangud sa ila negosyo, sila ang exposed sa high risk nga mangin targets sang mga criminal elements.
Ang permit to carry firearms outside of residence ang dapat nga igaisyu sang PNP chief ukon sang duly authorized representative sa sin-o man nga kwalipikado nga tawo nga ang kabuhi ang yara sa peligro bangud sa iya nga trabaho.
